Дьокуускай куоракка уонна Жатай бөһүөлэккэ быстах кэмҥэ ууну араарыахтара

Атырдьах ыйын  22 күнүгэр киэһэ 22:00 чаастан сарсыарда 06:00  чааска диэри былаан быһыытынан кыстыкка бэлэмнэнии чэрчитинэн өрөмүөннүүр үлэлэр ыытылалларынан Дьокуускай куоракка уонна Жатай бөһүөлэккэ быстах кэмҥэ ууну араарыахтара.

Бу туһунан «Водоканал» АУо пресс-сулууспата иһитиннэрдэ. «Быйыл магистральнай уу турбаларын учаастактарынан көһөрүү, ону тэҥэ икки сүрүн насоснай ыстаансыйаларга приемнай резервуардары ыраастааһын үлэтэ былааннанар. Маны таһынан элекроника уонна автоматика ревизията уонна да атын үлэлэр ыытыллыахтара», — диэн иһитиннэрдилэр.

Үлэ уустугунан уонна технологическай схема уратытынан сибээстээн бу күн быстах кэмҥэ ууну биэриини тохтоторго быһаарыы ылылынна. Санатан эттэххэ, маннык ууну араарыы бу сыл атырдьах ыйын 8 күнүттэн түүнүгэр оҥоһуллубута.