Дьокуускай куорат 39-с нүөмэрдээх оскуолатыгар бэлиэ тэрээһиҥҥэ ыалдьыттаатыбыт

Варвара Сергеевна Иванова-Зверева салайааччылаах СӨ бэтэрээн педагогтарын Сэбиэтин дэлэгээссийэтэ Н.И. Шарин аатынан киин куорат 39 №-дээх оскуолатыгар ыҥырыллан, С.А.Зверев-Кыыл Уола төрөөбүтэ 125 сылыгар аналлаах “Наследие в сердце” диэн тэрээһиҥҥэ кытынна.

Дэлэгээссийэни дириэктэр эбээһинэһин толорооччу Айтал Владимирович Плотников уонна билимҥэ солбуйааччы Олег Егорович Филиппов көрүстүлэр. 250 миэстэлээх оскуола саалатын лыык курдук толорбут оҕолор, күндү ыалдьыттарын туран эрэ ытыстарын таһынан көрсөн долгуттулар.

“Сарсын — сарсын сарсыарда

Сайар халлаан сарыыта…»

Оскуола кэлэктиибин кытта көрсүһүүбүт Кыыл Уолун бу ырыа-тойугунан саҕаланна. Сүүнэ сцена эркинин толору сүдү киһибит олоҥхолуу олороро уруһуйдаммыта хас сценаҕа тахсыбыкка кымыстаах чороонун уунар курдук. Тыл этээччилэр даҕаны оннук ылынан, Сергей  Афанасьевичтыын илэ көрсүбүттүү сананнылар быһыылаах, эппиттэрэ-тыыммыттара көрөөччүгэ уратытык сайан киирдэ. СӨ үтүөлээх юриһа Игорь Игнатьевич Николаев  оҕолорго туһаайан: “Бастакы бэрэсидьиэммит М.Е. Николаев омук сиэрин-туомун өйдүүр, омук быһыытынан бэйэлэрин сатаан сыаналанар, саха итэҕэлиттэн, өйүттэн-санаатыттан тирэҕирэн тахсар дьиҥнээх саха элитатын иитэр санааттан, бу эһиэнин курдук оскуолалары аспыта. Дьэ, ол иһин биһиги бүгүн эһигини көрсөн олорон инникилээхпит диэн эрэнэбит, итэҕэйэбит. Маннык оҕолор иитиллэн таҕыстахтарына, эһиги ханна да тиийдэххитинэ, “Мин сахабын” диэн киэн тутта ааттыыр, саха сиэрин-туомун тутуһар, саха өйүн-санаатын истэ сылдьар буоллаххытына, ол аата саха омук тыыннаах. Эһиги учууталларгытыгар, дириэктэргитигэр наһаа улахан эппиэтинэс. Саха норуотугар ол курдук оҕолору иитэн таһаарыах тустаахтар” – диэн эттэ. Онуоха эбии киэн туттар киһибит бастакы кэргэнигэр уон биир оҕотуттан сибилигин соҕотоҕун тыыннаах ордон сылдьар төрөппүт кыыһа Варвара Сергеевна Иванова-Зверева уһулуччу ситиһиилэммит “Улуу Москуба туһунан тойук” поэматын ахтыбыта, аҕатын туһунан кэпсиир “Наследие в сердце” видеомемуартан быһа тардан көрдөрүллүбүтэ — оҕолорго ордук өйдөнүмтүө уонна тиийимтиэ буолла.

Эгэлгэ талааннаах Сэргэй Сибиэрэпкэ аналлаах тэрээһин биир сэргэх түгэнинэн, оскуолаҕа ити күн өссө биир “Креативнай 5”Б” кылаас  аһыллыыта биһиэхэ бэрт сонун буолла.

Креативнай диэх курдуктар. Оҕолор кылаастарын олоҕун киинэҕэ устубуттар. Дьиҥнээх баай диэн киһиэхэ доҕордоһуу уонна бэйэ-бэйэни өйөһүү, бары бииргэ түмүстэхпитинэ ханнык баҕарар моһоллору туоратыахпыт, олохпутун өссө интэриэһинэй оҥоруохпут диэн ис хоһоонноох. Бүтэһигэр хараҥа хоско кылаас оҕолоро сарын-сарыннарыттан өйөнсөн туран, бэйэ-бэйэлэригэр төлөппүөннэрин уоттарын бэрсиһэн сулустарын уматтылар уонна олору холботолоон кылаастарын аатын таһааран,  бырааһынньык өрөгөйүн үрдэттилэр. Ол кэннэ тутатына, киинэлэригэр оҕо оҕо курдук мэниктии, күлэ-үөрэ сылдьыбыттарын умнан, куоластыын уларыйан  дуоспуруннана охсон, мэктиэ тылларын этэн бардылар. Кинилэр саастарыгар биһиги пионерга киирэрбитигэр итинник мэктиэ тылбытын биэрэммит төһөлөөх элбэх туһалаах дьыалалары оҥорбуппутуй? Ол барыта – бу быыкайкаан оҕолор иннилэригэр. Эбиитин бэйэлэрэ толкуйдаан кылаастарын  аһыллыытын бырааһынньыгар бэлэмнээбит флешмобтарын кэмигэр далбаатаабыттарыгар, Олимпиада эһэчээнэ стадион үрдүнэн көтөрүн санатан, ахтылҕан иэйиитигэр куустаран ыллыбыт.

Кылаас, оскуола дьиҥнээх лидердэрэ бу креативнай кылаастан тахсыыһылар диэн кинилэргэ бүк эрэннибит.

Креативнай бэһис “Б” кылаас бу оскуолаҕа аһыллыыта умнуллубат устуоруйаланна. Ол айылҕаттан бэриллибит уһулуччу талааннаах Ытык кићибитин кытта ыкса ситимнэннэ. С.А.Зверев-Кыыл Уола омукпут киэргэлэ, киэн туттуута буоларын үөрэнээччилэригэр киэҥник биллэрэр хайысханы тутуспут Мария Леонидовна Прокопьева дириэктэрдээх Дьокуускай куораттааҕы Н.И. Шарин аатынан 39 №-дээх орто оскуолатын педагогическай кэлэктиибин үлэтэ атын үөрэх кыһаларыгар үтүө холобур буолуохтун. Тускуо!

СӨ бэтэрээн педагогтарын Сэбиэтин чилиэнэ А.Е. Семенова.