Дьокуускай куорат 805-с №-дээх быыбардыыр учаастага биир бөдөҥнөрө

Дьокуускай куорат 805-с №-дээх быыбардыыр учаастага биир саамай улаханынан, элбэх быыбардааччылааҕынан биллэр.

«Биһиэхэ быыбар этэҥҥэ, болдьоммут кэмигэр, сарсыарда 8:00 чааска Арассыыйа уонна Саха сирин өрөгөйүн ырыатынан аһыллыбыта», — диэн кэпсээнин саҕалыыр 805-с №-дээх быыбардыыр учаастак хамыыһыйатын бэрэссэдээтэлэ Камилла Спиридонова.

— Биһиги 805-с №-дээх быыбардыыр учаастакпыт бары ирдэбиллэри тутуһан, өрөгөй ырыата доҕуһуоллаах аһыллыбыта. Бэҕэһээ биһиги быыбардыыр учаастакпытыттан тахсыбыт дьон испииһэгин ылбыппыт. Кинилэр ханна тиийбит сирдэринэн куоластыыр бырааптаахтар. Ону таһынан балаҕан ыйын 4 күнүгэр диэри ханна тиийбит сирдэринэн куоластыырга сайабылыанньа биэрбит, биһиги учаастакпытыгар куоластыан баҕалаах дьон испииһэктэрин ылбыппыт.

Онон эбии 60 киһи атын реестринэн киириэхтэрэ. Бүгүн сарсыарда 8:00 ч. быыбардааччыбыт ахсаана 2429 этэ. Киһитин ахсаанынан биһиги учаастакпыт улаханнарга киирсэр. Быыбардааччыларбытыгар барыларыгар болҕомтоҕо уурар, кинилэргэ хайдах куоластыылларын быһаарар, көмөлөһөр, учаастакпытыгар, хамаандабытыгар 17 киһи үлэлиир. Бүгүн, балаҕан ыйын 8 күнүн, 14:00 ч. түмүгүнэн 335 киһи быыбардаата. Манна мин бэлиэтээн этиэм этэ, бу дьон ахсаана уларыйыан сөп.

Тоҕо диэтэххэ, биһиги учаастакпытыгар регистрациялаах эрээри, ханнык эмэ төрүөтүнэн испииһэккэ киирбэккэ хаалыахтарын сөп. Холобур, соторутааҕыта эрэ биһиги учаастакпытыгар регистрацияламмыт дьон баар буолуохтарын сөп. Чопчу түмүк биһиги балаҕан ыйын 10 күнүгэр 20:00 ч. тахсыаҕа», — диэн кэпсээтэ 805-с №-дээх быыбардыыр учаастак бэрэссэдээтэлэ Камилла Спиридонова.