Киин куорат 84 саастаах олохтооҕо хаар уутуттан баайа-дуола алдьаммытыгар үп-харчы ирдэннэ

Дьокуускай куорат борокуратуурата 1941 с.т. аҕа саастаах дьахтар сайабылыанньатынан, салайар тэрилтэ дьиэ уопсай баайын-дуолун көрүүгэ-харайыыга, дьиэ кырыыһатыттан хаары хомуйууга эбээһинэһин ситэ толорботоҕун түмүгэр, П. Алексеев уулуссаҕа турар дьиэҕэ сайабылыанньалааччы кыбартыыратын хаар уута ылбытын быһаарда.

Бу туһунан СӨ Борокуратууратын пресс-сулууспата иһитиннэрэр. Онон сибээстээн, суут борокуратуура ирдэбилинэн «Губинскай ОДьКХ» салайар хампаанньатыттан дьахтарга  баайыгар-дуолугар оҥоһуллубут хоромньуну, моральнай хоромньуну, туһанааччы ирдэбилин толорботоҕун иһин ыстараабы уонна сыаналааһын ыытыытыгар тахсыбыт ороскуоту, холбоон 483 тыһ. солк. тахса сууманы төлөттөрдө. Быһаарыы сокуоннай күүһүгэр киирэ илик.