Дьокуускай куорат бэтэрээннэрин Ыһыаҕа Улуу Кыайыы 80 сылыгар ананна

Бэс ыйын 18 күнүгэр Дьокуускайга Намныыр тракт суолун 20 км Кумахтаах диэн кэрэ айылҕалаах сиргэ куорат бэтэрээннэрин ыһыаҕа буолан ааста.

Дьокуускай куорат дьаһалтатын пресс-сулууспата иһитиннэрэринэн, ыһыах Аҕа дойду Улуу сэриитигэр Кыайыы 80 сыллаах үбүлүөйүгэр ананна. Ыһыаҕы Дьокуускай куорат дьаһалтата киин куорат Бэтэрээннэрин Сэбиэтин кытта тэрийдэ.

Тэрээһин үөрүүлээх аөыллыыта күрэхтэһиилээх параадынан саҕаланна, онно уокуруктар уонна куорат таһынааҕы нэһилиэктэр бэтэрээннэрин Сэбиэттэрин холуонналара сэлэлии хаамтылар.

Бу күн үгүс бэтэрээн уокуруктааҕы дьаһалта уонна Дьокуускай куорат Дууматын наҕараадаларынан чиэстэннилэр. Кинилэргэ «1941–1945 сс. Аҕа дойду Улуу сэриитигэр Кыайыы 80 сыла» үбүлүөйдээх мэтээллэри туттардылар. Бу наҕараада аҕа көлүөнэҕэ убаастабыл уонна билинии бэлиэтинэн буолаллар. Түмүгэр бэтэрээннэр ыһыаҕы үҥкүүнэн уонна норуот ырыаларын толоруутунан дуоһуйдулар, ону таһынан бу күн оһуохай үҥкүүтэ ураты миэстэни ылла. Маны таһынан уокуруктар уонна куорат таһынааҕы нэһилиэктэр ааттарыттан кыттар бэтэрээннэр икки ардыларыгар талаан көрдөрүүтүн күрэҕэ уонна бастыҥ сахалыы таҥас көрүүтэ бырааһынньык күн ураты тыыны киллэрэн, үөрүүнү-көтүүнү эптэ.

Түмүгэр үгэскэ кубулуйбут тэрээһининэн аныгыскы бэтэрээннэр ыһыахтарын ыытар чиэскэ «Чороон Куубага» эстэпиэтэ Марха түөлбэҕэ туттарылынна. Онон эһиил мархалар Дьокуускай куорат бэтэрээннэрин ыһыаҕын ыытар бочуоттаах чиэскэ тигистилэр.