Дьокуускай куорат биир тиэргэнигэр массыынаны алдьатыыга уорбаланааччы дьахтары туттулар

Дьокуускай куорат полиция отделын дьуһуурунай чааһыгар киин куорат олохтооҕо сайабылыанньа суруйбут. Кини «Тойота Камри» мааркалаах массыынатын алдьаппыттарын туһунан иһитиннэрбит.

Эмсэҕэлээччи этэринэн, кини киэһэ массыынатын олорор дьиэтин тиэргэнигэр туруорбут, оттон сарсыарда туран бамперын ойоҕос кыната токуруйбутун  көрбүт.

Ыытыллыбыт суһал-ирдэбил дьайыылар түмүктэригэр полицейскайдар буруйу оҥорууга 39 саастаах дьахтар сыһыаннааҕын быһаардылар.

Силиэстийэҕэ быһаарыллыбытынан, уорбаланааччы итирик туруктаах сылдьан, тиэргэн аттынан ааһан иһэн эмсэҕэлээччи массыынатын таба көрбүт. Буруйу оҥорооччу дьахтар атын киһи массыынатын, бэйэтэ айдаарсыбыт билэр киһитин массыынатын кытта булкуйан, 15 төгүл атаҕынан тэбиэлээбит.

РФ Холуобунай Кодексатын 167-с ыстатыйатын 1-кы чааһынан («Соруйан баайы-дуолу суох оҥоруу эбэтэр алдьатыы») холуобунай дьыала көбүтүлүннэ.Буруйдаах дьахтар 2 сылга диэри көҥүлэ быһыллыан сөп. Бу туһунан Саха сиринээҕи ИДьМ пресс-сулууспата иһитиннэрэр