Дьокуускай куорат кытыытыгар эһэ баара бигэргэннэ

Дьокуускайдааҕы айылҕа харыстабылын кэмитиэтэ чугастааҕы ойуурга дьон эһэни көрбүттэрин туһунан иһитиннэриини бигэргэттэ диэн ЯСИА суруйар.

Бу иһитиннэриини кулун тутар 8 күнүгэр Дьокуускай куорат  дьаһалтатын былаанныыр мунньаҕар эппиттэр.

Санатан эттэххэ, чэппиэр сарсыардатыгар Дьокуускай куорат таһынааҕы Владимировка сэлиэнньэтин аттыгар дьоннор эһэни көрбүттэрин туһунан тыллаабыттар.

«Сэлиэнньэ аттыгар эһэ сылдьарын туһунан иһитиннэрии киирбитэ. Ол эрээри ханна чопчу сылдьарын була иликпит. Дьон эһэни куораттан 34 км сиргэ, гаас турбата ааһар сиригэр көрбүттэр. Билиҥҥитэ, эчэйии да, хоромньу да суох, онон эһэни өлөрүү туһунан быһаарыы ылыллыа суоҕа», — диэн биэдэмэстибэ салайааччыта эппит.

Саха сиригэр сайын устата эһэ дьоҥҥо саба түһүүтүн хас даҕаны түгэнэ бэлиэтэннэ. Атырдьах ыйын 28 күнүгэр Орто Халыма улууһугар дэриэбинэттэн чугас эһэ киһини тардыбыта. Аллараа Халымаҕа адьырҕа кыыл Улахан Анюй өрүс кытылыгар киһиэхэ саба түһэн эчэппитэ. От ыйын бүтүүтэ Аллайыаха улууһугар тыатааҕы эмиэ киһиэхэ саба түспүтэ.