Дьокуускай куорат лааҕырдарыгар 10 739 сайабылыанньа киирбит

Үөрэх уонна билим министиэристибэтин “Судаарыстыбаннай өҥө биир кэлим порталын (ЕПГУ) нөҥүө өрөспүүбүлүкэҕэ оҕо сынньалаҥын уонна доруобуйатын чэбдигирдиитин тэрийиигэ сайабылыанньаны тутууну саҕалааһын күнүн, бириэмэтин бигэргэтэр туһунан” бирикээһигэр олоҕуран, 2025 сыл ыам ыйын 15 күнүттэн сайабылыанньаны ылыы саҕаламмыта.

“Дьокуускай куорат” куораттааҕы уокурукка быйыл 64 лааҕыр аһыллыаҕа:

• — 5 – куорат таһынааҕы стационарнай;
• — 2 – үлэ уонна сынньалаҥ;
• — 3 — балаакканан;
• — 54 — күнүскү.

Ыам ыйын 15 күнүгэр, киэһэ 18 ч. Дьокуускай куоракка 10 739 сайабылыанньа киирбит (ол иһигэр төрөппүттэр, сокуоннай бэрэстэбиитэллэр баҕаларынан хас даҕаны лааҕырга бэриллибит сайабылыанньа).

Босхо путевкаҕа анал байыаннай дьайыы дьиэ кэргэнин, тиийиммэт-түгэммэт ыал оҕолоро, тулаайах, төрөппүт көрүүтэ-истиитэ суох хаалбыт, доруобуйаларынан хааччахтаах оҕолор уонна элбэх оҕолоох ыал оҕолоро хапсаллар. Быйыл муниципалитеттан субсиядияны анал байыаннай дьайыы кыттыылааҕын 1973 оҕото ылыаҕа.

Бэлиэтээн эттэххэ, бу сылга оҕо сынньалаҥын уонна доруобуйатын чэбдигирдиини тэрийии барыллаан испииһэгэр 560 лааҕыр киирдэ, онно 57 тыһ. тахса оҕо сынньаныаҕа. Итинтэн 434 лааҕыр — күнүскү, 48 лааҕыр — куорат таһынааҕы стационарнай, 43 лааҕыр — үлэ, сынньалаҥ уонна 35 лааҕыр — балаакканан. Ону тэҥэ, 86 этнокултуурунай хайысхалаах лааҕыр аһыллан, оҕолор бэйэлэрин норуоттарын үгэстэрин, тылларын үөрэтэллэригэр кыаҕы биэриэҕэ.

Оҕо сынньалаҥар сыһыаннаах үөскээбит боппуоруоһу суһаллык быһаарар уонна сүбэни-аманы биэрэр единэй төлөпүөн нүөмэрэ үлэлиир: 8-800-550-14-21. Бу туһунан Үөрэх уонна билим министиэристибэтин телеграмыгар суруйаллар.