Дьокуускай куорат маастар-былаанын олоххо киллэриигэ 10 млрд солкуобайы туһаныахтара

Ол туһунан бүгүн өрөспүүбүлүкэ баһылыга Айсен Николаев куорат дьаһалтатын мунньаҕар иһитиннэрдэ. “Дьокуускай куорат 2023-2024 сылларга маастар-былаанын олоххо киллэриигэ 10 млрд солкуобай көрүллүөҕэ. Куорат сайдыытын бары былаана итиннэ олоҕуруоҕа”, — диэтэ Айсен Николаев.

Үп-харчы Уһук Илин 25 куоратын сайдыытыгар инфраструктураҕа бүддьүөт кирэдьиитин чэрчитинэн көрүллүөҕэ. Бу сыалга федеральнай бүддьүөттэн Арассыыйа Бэрэсидьиэнин сорудаҕынан 100 млрд солк. көрүллэр. Саха сириттэн бу испииһэкк  Дьокуускай уонна Нерюнгри бааллар.

“Бу үбүнэн Дьокуускайга 2-с,4-с,17-с кыбартааллар инфраструктураларын тутууну торумнуубут. Сотору кэминэн бу сир-уот барыта уларыйан, “Спортивнай” саҥа түөлбэ үөскүөҕэ. Ону сэргэ үп Ленин болуоссатын уларытан оҥорууга уонна Сайсары күөл тулатын тупсарыыга ыытыллыаҕа. Үлэ быйыл саҕаланыахтаах”, — диэтэ өрөспүүбүлүкэ баһылыга.

Кини Дьокуускай устуоруйатыгар маннык хабааннаах бырайыак олоххо аан бастаан киирэрин бэлиэтээтэ. Манна архитектордар, бырайыактааччылар, тутааччылар, ресурсанан хааччыйар тэрилтэлэр кыттыахтара. Биэдэмистибэлэр икки ардыларынааҕы бырайыактыыр офис тэриллиэҕэ. Бу маастар-былаан 2021 сыл балаҕан ыйыгар Айсен Николаев илии баттаабыт 2032 сылга диэри кэмҥэ Дьокуускай куорат сайдыытын туһунан эрэгийиэн баһылыгын ыйааҕын толорууга ананна.

Маастар-былаан куорат инфраструктуратын тупсарыаҕа. 2021 сылтан “Звезднай” түөлбэ кэлимсэ сайдыытын инвестициялыыр бырайыага саҕаламмыта. Саха сирэ биир бастакынан 3686 мөл солк. инфраструктураҕа бүддьүөт кирэдьиитин ылар кыахтаммыта. Ону тэҥэ 990 миэстэлээх оскуола уонна поликлиника тутуутугар 2,7 млрд солкуобайдаах облигациятын тартылар. 2028 сылга диэри 265 тыһ кв.м. иэннээх дьиэлэр тутуллуохтара.

11 тыһыынча киһи бу түөлбэҕэ олоруоҕа.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыска: Андрей Сорокин түһэриитэ, СИА