Дьокуускайга мобильнай төлөпүөнү уоруу дьыалата арылынна

ИДьМ 3 №- дээх полициятын отделын дьуһуурунай чааһыгар Дьокуускай куорат олохтооҕо кыбартыыраттан 150 000 солк. суумалаах мобильнай төлөпүөнүн уорбуттарын туһунан сайабылыанньа суруйда. 

Суһал-көрдүүр дьаһалларынан  холуобунай ирдэбил үлэһиттэрэ уорбаланааччыны туттулар. Кини 26 саастаах эр киһи буолара билиннэ.

Силиэстийэ быһаарыытынан, быһылаан буолбут күнүгэр эмсэҕэлээччи доҕотторун кытта дьиэтигэр арыгы  испит. Дьиэ хаһаайына утуйбутун кэннэ биир ыалдьыт сыаналаах гаджеты уорбут уонна сарсыарда эрдэ кыбартыыраттан тахсан барбыт. Уорбут төлөпүөнүн атыылаабыт уонна харчыны барытын тус бэйэтигэр туттубут. Холуобунай дьыала тэрилиннэ диэн СӨ ИДьМ пресс-сулууспата суруйар.