Дьокуускай куорат “Парус” уһуйааҥҥа оҕолор чуҥкуйбаттар, билиини, саҥаны-сонуну судургутук ылыналлар

Дьокуускай куорат биир тарбахха баттанар 89-с нүөмэрдээх “Парус” бастыҥ уһуйааҥҥа «МОНТЕССОРИ ПРОСТРАНСТВО» оҕону сайыннарыы эйгэтэ тэриллэн эрэр. Айымньылаахтык үлэлиир уһуйаан кэлэктиибэ бырайыактарын, СӨ Үбүн министиэристибэтэ олоххо киллэрбит “Олохтоох көҕүлээһиннэри” өйүүр тосхол көрүүтүгэр таһаардылар.

Билиҥҥи кэм саҥа ирдэбиллэри туруорар, оттон “МОНТЕССОРИ ПРОСТРАНСТВО” бырайыак үөрэх хаамыытын хаачыстыбатын тупсарыыга күүс-көмө буолуоҕа: оҕо бары өртүнэн сайдарыгар, баҕатын хоту умсугуйан дьарыктанарыгар, уһуйааҥҥа саҥа кэлбит икки саастаах кырачаан түргэнник дьиэтийиитигэр, доруобуйатыгар хааччахтаах оҕолор төрөппүттэригэр көмө, хас биирдии оҕо сатабылын уонна талаанын сайыннарарыгар, оскуолаҕа барар оҕо билиитин хаҥатыыга туһуланар.

Монтессори эйгэтин дизайн бырайыага номнуо оҥоһуллубут. Бөлөҕү түөрт сүрүн хайысхаҕа араарбыттар: олох-дьаһах, сенсорнай сайдыы, хамсаныы-имсэнии уонна үөрэх эйгэлэрэ.

Онон “Парус” уһуйаан үлэһиттэрэ олохтоох көҕүлээһини өйүүр тосхол өйөбүлүн ыларга эрэллэрэ улахан!

Вероника АЯНИТОВА.