Дьокуускай куорат суута ньиэп хостуур хампаанньаны 200 тыһыынча солкуобайга ыстарааптаата

Дьокуускай куорат суута ньиэби хостооһунунан дьарыктанар хааччахтаммыт эппиэтинэстээх уопсастыбаҕа сыһыаннаах, РФ административнай быраабы кэһии туһунан кодексатын 9.1 ыстатыйатын 1 чааһынан көрүллүбүт дьыаланы көрдө. Бу туһунан СӨ сууттарын холбоһуктаах пресс-сулууспата иһитиннэрэр.

Суут дьыаланы көрүүтүн кэмигэр, уопсастыба бырамыысыланнай куттал суох буолуутун ирдэбиллэрин кэспитэ быһаарылынна. 2025 сыл алтынньытыгар Өлүөнэтээҕи Ростехнадзор управлениета «Фонд скважин (Маччобинского нефтегазоконденсатного месторождения)» «II класса опасности» диэн хампаанньа эбийиэктэригэр миэстэтигэр тиийэн бэрэбиэркэлээһини ыыппыт. Ол түмүгүнэн №116-ФЗ Федеральнай сокуон, «Ньиэп уонна гаас бырамыысыланнаһыгар куттал суох буолуутун быраабылалара», «Бырамыысыланнай куттал суох буолуутун ирдэбилин тутуһуу хонтуруолун тэрийии уонна ыытыы быраабылалара» кэһиллибиттэрин туһунан аакта оҥоһуллубут.

Ол курдук, Уопсастыба туттар «Фонд скважин (Маччобинского нефтегазоконденсатного месторождения)» бырамыысыланнай куттал суох буолуутун декларациятын оҥорботох. Ону таһынан, 4-с №-дээх кустовой былаһааккаҕа №2 компонена буолар С-1 киирэр сепаратор блогун зонатыгар теплай магистраллар изоляциялара сорҕото кэһиллибитэрэ биллибит. С-1 сепаратор блогуттан (БУОС №2 састаабыгар, 4 №-дээх кустовой былаһааккаҕа турар) уопсай факельнай установкаҕа барар гаас турба ситимин тохтотор уонна салайар арматуратын маркировката технологическай исхиэмэттэн туорааһыннаах оҥоһуллубут, чуолаан нумерация суох.

Бу кэһиилэринэн Өлүөнэтээҕи Ростехнадзор управлениета Уопсастыбаҕа сыһыаннаах административнай быраабы кэһиитин туһунан боротокуолу оҥорорго төрүөтүнэн буолбуттар. Дьокуускай куорат суута Уопсастыбаны РФ административнай быраабы кэһии туһунан кодексатын 9.1 ыстатыйатын 1 чааһынан көрүллүбүт административнай быраабы кэһиини оҥорбутугар буруйдааҕынан быһаарда уонна 200000 солкуобай кээмэйдээх ыстараабы түһэрдэ. Уураах сокуоннай күүһүгэр киирдэ.