Дьокуускай куораттан Түүлээххэ сайыҥҥы сырыылар саҕаланнылар

Олохпут хайа да түгэҥҥэ, ханнык даҕаны кэмҥэ айаны, суолу кытта ыкса сибээстээх. Ол да иһин буолуо үүнүүнү-сайдыыны мэлдьи суолу, айаны кытта холууллар, тэҥнииллэр.

Уус Алдан улууһун Түүлээх нэһилиэгэ төһө даҕаны улуус уһук сирэ уота буоллар, олоҕу кытта тэҥҥэ хардыылыыр, сайдар-үүнэр аартыктары арыйар. Суолбут боппуруоһа оччолортон баччаларга диэри сытыы уонна тыын диэн суолтаҕа турар. Ордук сайыҥҥы кэмҥэ. Дойдуга буолар быһыы-майгы олохпут бары хайысхатыгар охсуулааҕа бу манна эмиэ көһүннэ, ол курдук суолу-ииһи үбүлээһиҥҥэ, хааччыйыыга уустук балаһыанньа баар, ордук бу сылга оннук кытаанах балаһыанньа үөскүү сырытта. Субсидиянан үбүлээһин улаханнык быһыллан, чэпчэтиилээх айан суох буолар куттала үөскээбитигэр нэһилиэк баһылыга С.В.Винокуров быһаччы киирэн кэпсэтэн, баар быһыыны-майгыны ылыннарыылаахтык дакаастаабытын түмүгэр, нэһилиэнньэ туруорсуутун өйөөн-өйдөөн СӨ Тырааныспарын министиэристибэтин, чуолаан миниистири солбуйааччыта  Семен Коркин тус хонтуруолугар ылан, Дьокуускай куорат өрүс пордуттан сылдьар “Лазурнай” катер 10 рейси оҥорор буолла.

Дьэ бу буоллаҕа норуокка кыһамньылаах, болҕомтолоох буолуу чаҕылхай туоһута. Бастакы рейс бу күннэргэ барда. Катер толору айанньыттар,  нэһилиэнньэҕэ наадалаах таһаҕас арааһа барда.

Н.Руфова,  Хатас — Түүлээх