Дьокуускай күнэ: куорат олохтоохторун уонна ыалдьыттарын туох күүтэрий?

Дьокуускай куорат 393 сыллаах үбүлүөйүн сүрүн тэрээһиннэрэ балаҕан ыйын 12-14 күннэригэр ыытыллыахтара. Бу  туһунан киин куорат баһылыга Евгений Григорьев тэрийэр кэмитиэт мунньаҕар иһитиннэрдэ.

Субуотаҕа уонна баскыһыанньаҕа, балаҕан ыйын 13-14 күннэригэр, биэс сүрүн түһүлгэнэн 40-тан тахса култуурунай, успуорт уонна уопсастыбаннай тэрээһиннэр ыытыллаллара былааннанар.

Өрөспүүбүлүкэ болуоссатыгар балаҕан ыйын 13 күнүгэр бырааһынньык официальнай чааһа буолуоҕа. Ону таһынан, «Читай-город» бибилэтиэкэ бырагыраамата квестэрдээх, быыстапкалардаах ыытыллыа, фокусниктар интерактивнай дьүһүйүүлэрэ көрөөччүлэри сөхтөрүө уонна киэһэтин саха эстрадатын сулустарын улахан кэнсиэрэ түмүктүө.

Доҕордоһуу болуоссатыгар балаҕан ыйын 13 күнүгэр «Этноран.Якутия» маассабай сүүрүү саҕаланыа, ГТО нуорматын туттарбыттарга бэлиэлэр туттарыллыахтара, бырааһынньыктааҕы оһуокай түһүлгэтэ тэриллиэ, ону сэргэ сахалыы остуол оонньуулара ыытыллыахтара.

Эргэ куоракка икки күн устата уран тарбахтаахтар уонна кэлиэксийэлээхтэр быыстапкалара-дьарбааҥкалара, историческай квестер, кэнсиэрдэр тэриллиэхтэрэ. Ону тэҥэ, «Ретро-Якутск» диэн 40-с сыллардааҕы куорат олохтооҕун уобараһын айыыга норуот күрэҕэ ыытыллыаҕа. Оттон балаҕан ыйын 14 күнүгэр манна «Уха-фест» уонна ыччакка аналлаах бырагыраама күүтэр.

Кыайыы пааркатыгар креативнай индустрия дьарбааҥката тэриллиэ, онно «Үлэ кыбаартала» креативнай кластер резиденнэрэ бэйэлэрин бырайыактарын билиһиннэриэхтэрэ. Бырагыраамаҕа мас олордуута, бырааһынньыктааҕы кэнсиэр, «Күөх куубак» куораттааҕы күрэх түмүгүнэн наҕараадалааһын, ону тэҥэ территориальнай уопсастыбаннай салайыныы эйгэтигэр наҕараадалары туттарыы киирдилэр.

Култуура уонна сынньалаҥ пааркатыгар эмиэ икки күн устата араас саастаах куорат олохтоохторугар аналлаах сынньалаҥ бырагыраамалар ыытыллыахтара. Бу күннэргэ үөрэх управлениета оскуолаларга патриотическай иитиигэ, кыраайы үөрэтиигэ, төрөөбүт куорат устуоруйатын, култууратын кытта билиһиннэриигэ туһуламмыт тематическай дьарыктары уонна кылаас чаастарын тэрийэр.

Балаҕан ыйын 12 күнүгэр Оҕо хамсааһынын киинэ арыллыыта былааннанар. Итини таһынан, Куорат күнүгэр анаан «Барыта – Кыайыы туһугар!» аһымал аахсыйа дьарбааҥката уонна оскуола аһылыгын быыстапката-дьарбааҥката тэриллиэхтэрэ. Үгэс быһыытынан, Куорат күнүн иннинэ баһылык Евгений Григорьев Дьокуускай куорат Ытык Сүбэтин кырдьаҕастарын уонна куорат уопсастыбаннаһын кытары көрсүөҕэ. Ону таһынан, «Дьокуускай 4.0.0.» пуоруму ыытыыга бэлэмнэнии үлэтэ барар.