Дьокуускай олохтооҕо бииргэ олорор дьахтарын кырбаан дьыала тэрилиннэ

Дьокуускай куорат полициятын 3-с нүөмэрдээх салаатын учаастактааҕы боломуочунайдара Уус Алдан улууһуттан төрүттээх, урут сууттана сылдьыбыт 49 саастаах киһи буруйдааҕын быһаардылар. Бу туһунан ИДьМ Дьокуускайдааҕы салаата иһитиннэрэр.

Полиция үлэһиттэрэ быһаарбыттарынан, бу дьон доҕотторугар ыалдьыттыы сылдьан арыгы испиттэр. Ол сылдьан кинилэр айдаарсыбыттар уонна эр киһи дьахтары үнтү кырбаабыт. Түмүгэр дьахтар түөһэ эчэйбит уонна ойоҕосторо тостубуттар.

Буруйдаахха РФ Холуобунай кодексатын 112-с ыстатыйатын 1-кы чааһынан (киһи доруобуйатыгар ыар хоромньуну соруйан оҥорууга) холуобунай дьыала тэрилиннэ. Бу буруй иһин 3 сылга диэри хаайыыга барыахха сөп.