Дьокуускай олохтооҕо биллэрии саайтарынан хас да түөкүннээһиҥҥэ буруйданна

Дьокуускай куорат борокуратуурата улахан суумалаах хоромньулаах алта түөкүннээһин түгэнигэр буруйданар 31 саастаах эр киһи холуобунай дьыалатын суукка ыытта.

Силиэстийэ барылынан, буруйданааччы «Doska.ru» уонна «Юла» саайтарга баайы-дуолу атыылыыр эбэтэр куортамныыр туһунан биллэриилэри булар эбит. Онтон бас билээччилэри кытта көрсөн, сымыйа төлөбүр докумуонун көрдөрөр эбэтэр харчыны хойут ыытыам диэн эрэннэрэр эбит. Кини тылыгар итэҕэйбит дьон баайдарын-дуолларын биэрэн ыыталлара биллибит. Ол кэннэ хара санаалаах ылбыт малларын Дьокуускай куорат комиссионнай маҕаһыыннарыгар туттарбыт. Оҥоһуллубут хоромньу уопсай суумата 487 тыһыынча солкуобайга тэҥнэспит. Силиэстийэнэн 300 тыһыынча солкуобайтан тахса сыаналаах уоруллубут баай-дуол төннөрүлүннэ. Итини таһынан, буруйданааччы бас билэр дьиэтэ уонна сирин учаастактара былдьанна, — диэн СӨ Борокуратууратын пресс-сулууспата иһитиннэрэр.