Дьокуускай олохтооҕо дьахтар байыас харчытын уорууга уорбаланар

Дьокуускай олохтооҕо дьахтар байыаннай дьайыыга кытта сылдьар эр киһи харчытын уорууга уорбаланарын туһунан СӨ ИДьМ пресс-сулууспата иһитиннэрэр.

Барыллаан биллибитинэн, 2022 сыл күһүнүгэр уорбаланааччы дьахтар Улан-Удэ куоракка волонтердуу тиийэн баран Саха сириттэн сылдьар байыаннай сулууспалаах эр киһини кытта билсибит. Кини онно бэлэмнэниини ааһа сылдьыбыт. Дьахтар Дьокуускайга төннөөрү сырыттаҕына, эр киһи киниэхэ итэҕэйэн харчылаах каартатын пин-кодун этэн туран биэрбит. Бу каартаны кэпсэтии быһыытынан, дьахтар эр киһи аймахтарыгар тиксэриэхтээх эбит.

Бу түгэни туһанан, уорбаланар дьахтар 2022 сыл ахсынньытыттан 2023 сыл кулун тутарыгар диэри каартаҕа байыаннай дьайыы кыттыылааҕар төлөнөр хамнаһы тутта сылдьыбыт. Бу 1 162 000 солкуобайга тэҥнэспит.

Бу быһылаанынан холуобунай дьыала тэрилиннэ, силиэстийэ салҕанар.