Дьокуускай олохтооҕо ийэ хапытаалын борокуратуура нөҥүө ирдэһэн ылла

Борокуратуура ирдэбилинэн, Дьокуускай куорат олохтооҕо өрөспүүбүлүкэтээҕи «Дьиэ кэргэн» ийэ хапытаалын — 316,2 тыһ. солк. ылар кыахтанна.

Оҕо төрөөбүт дьахтарга Саха сиригэр биэс сыл устата регистрацията суоҕун иһин ылыахтаах төлөбүртэн аккаастаабыттар. Ол эрээри, сайабылыанньа биэрээччи өрөспүүбүлүкэ төрүт олохтооҕо буоларын быһаарбыт. Кини урут Саха сирин биир улууһугар учуокка турбут эбит. Онон кини көмө көрдөөн, надзорнай уоргаҥҥа сайабалыанньалаах тиийбит.

Борокуратуура бу дьайыыны сокуону кэһиинэн аахта. Дьиэ кэргэҥҥэ тиксиэхтээх үп-харчы тиксэрилиннэ, оттон Социальнай харыстабыл управлениетын салайааччыта «Судаарыстыбаннай уонна муниципальнай өҥөлөрү оҥорууну тэрийии туһунан сокуону кэһии» ыстатыйанан административнай эппиэтинэскэ тардылынна.