Дьокуускай олохтооҕо ийэтиттэн тэлэбиисэр уорбут

Арассыыйа ИДьМ «Дьокуускайдааҕы» 1 №-дээх полиция отделын дьуһуурунай чааһыгар Дьокуускай олохтооҕо дьахтар дьиэтиттэн тэлэбиисэр уонна көмпүүтэр мониторун уорбуттарын туһунан сайабылыанньа суруйбут.

Уопсайа 55 тыһыынча солкуобайдаах хоромньу тахсыбыт диэн ИДьМ «Дьокуускайдааҕы» салалтатын пресс-сулууспата иһитиннэрэр.

Суһал көрдүүр отдел уонна холуобунай ирдэбил үлэһиттэрэ эмсэҕэлээбит дьахтар 44 саастаах уола уорбутун быһаардылар.

Биллибитинэн, уоруу буолбут кэмигэр ийэ уонна уол бииргэ олорор эбиттэр. Дьахтар дьиэтигэр суох кэмигэр, эр киһи кыбартыыраҕа баар тэхиньикэни ломбардка илдьэн туттарбыт, ылбыт харчытынан итирдэр утах атыыласпыт.

РФ Холуобунай кодексын 158 ыстатыйатын 2 чааһынан («Уоруу») холуобунай дьыала көбүтүллүбүт. Бу ыстатыйанан буруйдаах 5 сылга диэри көҥүлэ быһыллыан сөп.