Дьокуускай олохтооҕо саҥа билсибит доҕоруттан үнүстүрүмүөннэри уорбут

ИДьМ сулууспатын «Дьокуускайдааҕы» 1 №-дээх полициятын отделын дьуһуурунай чааһыгар олохтоох киһи кыбартыыратын иһиттэн шуруповерт уонна болгарка уоруллубуттарын туһунан сайабылыанньа суруйбут.

Уопсай хоромньу 11 тыһыынча солкуобайга тэҥнэспит. Холуобунай ирдэбил үлэһиттэрэ ыыппыт көрдүүр дьаһалларын түмүгэр урут сууттана сылдьыбыт, Нам улууһуттан төрүттээх 42 саастаах эр киһи буолара быһаарыллыбыт.

Силиэстийэҕэ быһаарыллыбытын курдук, эр дьон уулуссаҕа билсибиттэр. Кэпсэтэн баран, эмсэҕэлээччи саҥа билсибит киһитин арыгы иһээри дьиэтигэр ыалдьыттата ыҥырбыт. Арыгылыы олорон дьиэлээх хаһаайын утуйан хаалбыт. Ол кэмҥэ буруйу оҥорооччу  үнүстүрүмүөннэри уоран ылан, кыбартыыраттан кыбынан барбыт. Кэлин уоруллубут малы ломбардка 1500 солкуобайга туттарбыт.

ИДьМ пресс-сулууспата суруйарынан, РФХолуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Бу ыстатыйанан буруйдаах биэс сылга диэри көҥүлэ быһыллыан сөп.