Дьокуускай олохтооҕо «сымыйа» авиабилиэти атыылаабыт

Полицияҕа дьахтар «Дьокуускай – Санкт-Петербург» туһаайыытынан 39 тыһыынча солкуобайы төлөөн билиэт атыыласпытын, ол эрээри билиэти ылбатаҕын туһунан үҥсүү киллэрбит.

Полиция үлэһиттэрэ «сымыйа»  билиэти атыылаабыт киһини булбуттар – 20 саастаах Дьокуускай олохтооҕо буоларын быһаарбыттар. Кини социальнай ситиминэн ханнык баҕарар хайысхаҕа авиабилиэттэри атыылыыр туһунан биллэриини таһаарбыт, харчыны ылбыт уонна сибээскэ тахсыбатах. Уорбаланааччы эппитинэн, уоруллубут харчытынан иэстэрин саппыт.

Киниэхэ «Түөкүннээһин» ыстатыйатынан холуобунай дьыала тэриллибит. Бу ыстатыйанан буруйдаах 5 сылга диэри көҥүлэ быһыллыан сөп.

Полиция үлэһиттэрэ авиабилиэттэри онлайн нөҥүө атыылаһарга сэрэхтээх буоларга уонна ааҕыныстыбалар өҥөлөрүнэн эрэ туһанарга ыҥыраллар диэн Арассыыйа ИДьМ «Дьокуускайдааҕы» салаатын пресс-сулууспата иһитиннэрэр.