Дьокуускай олохтооҕо «Тойота Лэнд Крузер 200» массыынатын былдьатта

Дьокуускай куорат олохтооҕо, 48 саастаах эр  киһи арыгы иһэн баран иккистээн уруулга олорон «Тойота Лэнд Крузер 200» массыынатын былдьатта.

Былырыын, алтынньы ыйга, Шавкунов уулуссаҕа баар гарааһыттан Дзержинскэй уулуссаҕа дьиэтигэр итирик туруктаах айаннаабыт. Кинини суолга ГИБДД үлэһиттэрэ туппуттар.  РФ Холуобунай кодексын 264 ыст. 1 ч. буруйдааҕа быһаарыллан күһэлэҥ үлэҕэ анаммыт, ону сэргэ икки сыл устата массыына ыытар бырааба быһыллыбыт. Маны таһынан 2022  с. атыыласпыт «Тойота Лэнд Крузер 200» массыынатын былдьаабыттар. Бэлиэтээн суруйдахха, арыгы иһэн баран уруулга олорон кини административнай эппиэтинэскэ тардылла сылдьыбыт. Ол эрээри бэйэтигэр сөптөөх түмүктэри оҥостубатах.