Дьокуускай олохтооҕо Ярославскай уулуссаҕа маҕаһыынтан шуруповерт уорбут

Дьокуускай полицейскайдара тиэхиньикэ маҕаһыыныттан уорууну арыйбыттар. 

Дьуһуурунай чааска сайабылыанньа суруйан, Ярославскай уулуссаҕа маҕаһыын бэрэстэбиитэлэ ыҥырбыт. Табаар уопсайа 15 тыһыынча солкуобайга сүппүтүн кэпсээтэ.

Суһал тэрээһиннэр кэмигэр олохтоох 36 саастаах эр киһини туппуттар. Видеонан кэтээн көрөр камераҕа уһуллубутун көрбүттэр.

«Уорбаланааччы атыылаһааччы буолан хара санаалаах эр киһи маҕаһыыҥҥа киирбит. Үлэһиттэр суохтарын туһанан, стеллажтан шуруповерт ылбыт. Кинини ким да кэтээн көрбөтөҕүн бэлиэтээн, эр киһи таҥаска кистээн атыы-эргиэн дьиэтиттэн шуруповерт илдьэ тахсыбыт»,-диэн Арассыыйа ИДьМ пресс- сулууспата суруйар. Холуобунай дьыала тэрилиннэ. Кинини 100-тэн 500 тыһыынча солкуобайга диэри ыстараап күүтэр, алта сылга диэри болдьоххо көҥүлэ быһыллара сабаҕаланар.