Дьокуускай олохтооҕуттан икки мөлүйүөнү албыннаан ылбыт

РФ ИДьМ “Саха сиринээҕи” МУ сибээс уонна интэриниэт ресурсаларын туһанар уоруйахтары арыйар салаатын үлэһиттэрэ Приморскай кыраай 26 саастаах олохтооҕун туттулар. Кини Дьокуускай олохтооҕун албыннаан 2 мөл. солк. ылбыт.  

Саха сиригэр олорор быраас Приморскай кыраайга массыына саппаас чаастарын атыылыыр киһи өҥөтүнэн туһанарга быһаарыммыт. Бастаан туох да эрэйэ суох дьоҕус сакаастары ыыта олорбут. Оттон итэҕэлгэ киирэн, хара санаалаах эбии араас ороскуокка диэн сакаасчыттан харчыта ыыт диэн модьуйан барбыт, кэлин тиһэҕэр тиийэн олох да сибээскэ тахсыбат буолбут. Ол кэнниттэн  Дьокуускай олохтооҕо полицияҕа тиийбит.

Суһал-ирдиир үлэ түмүгүнэн Саха сирин полицейскайдара Приморскай кыраайга тиийэн уорбаланааччыны тутан, өрөспүүбүлүкэҕэ аҕаллылар.

Бу чахчынан РФ ХК 159 ыст. 4 ч. “Түөкүннээһин” холуобунай дьыала тэрилиннэ. Билигин тутуллубут киһи хаайыллан олорор. Силиэстийэ түөкүннээһиҥҥэ быраас эрэ түбэспэтэх буолуохтаах диэн сабаҕалыыр, 26 саастаах уорбаланааччы азартаах оонньууларынан үлүһүйэрэ биллибит. Бу туһунан ИДьМ Саха сиринээҕи пресс-сулууспата иһитиннэрэр.