Дьокуускай олохтоохторун сарсыардааҥҥы сэрээккэлэргэ ыҥыраллар

Ыам ыйын 11 күнүгэр Кыайыы болуоссатыгар “Сарсыардаҕын кыайыыттан саҕалаа – бэйэҕин кыайыыттан” диэн ыҥырыылаах сарсыардааҥҥы маассабай сэрээккэлэри саҕалыыр үөрүүлээх тэрээһин буолуоҕа. Сэрээккэҕэ СӨ успуорка уонна физическэй култуураҕа миниистирин солбуйааччы Гаврил Мохначевскай кыттыаҕа.

Оҕунан ытыыга Арассыыйа успуордун маастара, уопуттаах фитнес-инструктор Полина Абрамова кэлбит дьоҥҥо сэрээккэни ыытыаҕа. Тэрээһин 07:30 чаастан саҕаланар.

Сарсыарда эрдэттэн хамсанан-имсэнэн, хааны, лимфаны хамсатан, салгын сиэн, дьону кытары билсэн, кэпсэтэн, күҥҥүн туһалаахтык атаарарга бэлэм буолаҕын, ону тэҥэ, чэгиэн буоларга, доруобуйаҕын көрүнэргэ ыллар хардыы оҥороҕун.