Дьокуускай оптуобустарыгар киһи сүргэтин көтөҕөр этиилэр баар буоллулар

11 №-дээх саҥа маршрут оптуобус салоннарыгар  пассажирдар сүргэлэрин уонна санааларын көтөҕөр саха тылынан истиҥ этиилэри суруйар буолбуттарын киин куорат олохтоохторо социальнай ситимнэринэн тарҕаттылар.

Бу — «Саха Тыла 400» уопсастыбаннай түмсүү бырайыага. Түмсүү чилиэттэрэ саха тылын сөргүтэллэр уонна киэҥ араҥаҕа тарҕаталлар.

Бу иннинэ «Саха Тыла 400» уопсастыбанньыктарынан Дьокуускай куорат олохтоох дьаһалтатын өйөбүлүнэн куорат уулуссаларын ааттарын икки тылынан суруйуу бырайыага саҕаламмыта, ону тэҥэ  оптуобустар тохтобулларынан саха тылынан иһитиннэрэр бырайыага дьон сэҥээриитин ылбыта.

«Төрөөбүт тылы хайа баҕарар саастан үөрэтиэххэ сөп. Баҕа эрэ наада! Бары күүһү туһанан, интэриэһи күөдьүтүөххэ, билиини биэриэххэ, эйгэни кэҥэтиэххэ!», — «Саха Тыла 400» түмсүү.