Дьокуускай оскуолаларыгар мэдиссиинэ кэбиниэтин саҥардаллар

Дьокуускайдааҕы үөрэх управлениетын начаалынньыга Мария Петрова бүгүн 20, 18 уонна 27 №-дээх оскуолаларга мэдиссиинэ кэбиниэттэрин өрөмүөннээһин хаамыытын кытта билистэ.

Сарсын 30 уонна 32 №-дээх оскуолаларга сылдьыы былааннанар диэн Дьокуускай куорат дьаһалтатын пресс-сулууспата иһитиннэрэр.

Бырагыраама чэрчитинэн кэбиниэттэр саҥардыллаллар, аныгы тэриллэр туруоруллаллар уонна интэриниэккэ холбоноллор.

Медкэбиниэккэ уопуттаах мэдиссиинэ үлэһиттэрэ үлэлиэхтэрэ. Кинилэр оскуола оҕолорун доруобуйаларын харыстыырга туһуламмыт көрүүлэри уонна ыарыыны сэрэтэр тэрээһиннэри ыытыахтара.

Өрөмүөн СӨ Ил Дарханын оскуолаларга мэдиссиинэ үлэтин туһунан Этиитин чэрчитинэн ыытыллар уонна үөрэх тэрилтэлэригэр өҥө хаачыстыбатын уонна санитарнай куттал суох буолуутун үрдэтэр кыаҕы биэрэр.