Дьокуускай таһыгар суол саахалыгар икки киһи тыына быстыбыт

Бүгүн, атырдьах ыйын 9 күнүгэр, түүн үс чаас саҕана Хатас сэлиэнньэтигэр «Toyota Allion» массыына уонна «Regulmoto» матасыыкыл кыттыылаах суол быһылаана тахсыбыт. Бу туһунан Саха сиринээҕи Госавтоинспекция пресс-сулууспата иһитиннэрэр.

Бу быһылаан түмүгэр матасыыкыл сокуоннай сааһын ситэ илик суоппара уонна пассажира миэстэтигэр өллүлэр.

Билиҥҥи туругунан быһылаан тахсыбыт сиригэр силиэстийэлиир-суһал бөлөх уонна Судаарыстыбаннай ГАИ үлэһиттэрэ үлэлииллэр.

«Алдьархай быһылаан төрүөтэ быһаарыллар», — диэн Дьокуускайдааҕы ГАИ пресс-сулууспата иһитиннэрдилэр.