Дьокуускай таһыгар тыатааҕыны көрбүттэр

Чэппиэр күн сарсыарда Дьокуускай куорат Владимировка сэлиэнньэтин таһыгар олохтоохтор тыатааҕыны көрбүттэр. Быһылаан буолбут сиригэр иниспиэктэрдэр тиийдилэр диэн Саха сирин Айылҕа харыстабылын министиэристибэтиттэн ЯСИА-ҕа иһитиннэрдилэр.

«Бүгүн сарсыарда Владимировка сэлиэнньэтин чугаһыгар тыатааҕы баарын туһунан иһитиннэрии киирдэ. Онно икки бастыҥ үлэһиппит бардылар. Кинилэр олохтоохтору кытта кэпсэтиэхтэрэ, тыаны кэрийэн чинчийиэхтэрэ. Үлэлэрин түмүгүнэн сөптөөх миэрэлэр ылыллыахтара», — диэн биэдэмистибэ пресс-сулууспата иһитиннэрдэ.

Айылҕа харыстабылын министиэристибэтэ урут иһитиннэрбитинэн, өрөспүүбүлүкэҕэ тыатааҕылар нэһилиэнньэлээх пууннарга чугаһыыр түбэлтэтэ элбиир. Ахсааннара булт аҕыйаабытыттан биллэ улаатта — лимиттэн баара-суоҕа 18–23% тыатааҕыны бултууллар.