Дьокуускай телебашнята триколор өҥүнэн сандаарыаҕа

Атырдьах ыйын 22 күнүгэр, РФ Судаарыстыбаннай былааҕын күнүгэр, Дьокуускай телебашнята РФ судаарыстыбаннай былааҕын өҥүнэн сандаарыаҕа.

Дьокуускайдааҕы телебашня архитектурнай уота 20:00 чаастан 23:00 чааска диэри холбоноро былааннанар.

Судаарыстыбаннай бырааһынньыкка дойду үрдүнэн РТРС телебашняларын архитектурнай уоттар бырааһынньыктааҕы көстүүлэрэ киэргэтиэҕэ. Останкино башнятын медиафасадыгар триколор көстүөҕэ. Нальчик уонна Нижнэй Новгород куораттар телебашняларын уот панноларыгар «Атырдьах ыйын 22 күнэ – РФ Судаарыстыбаннай былааҕын күнэ» диэн сурук көстүөҕэ.

Останкино телебашнятын шпилигэр Арассыыйа триколорун былааҕа тэлимниэҕэ. Дойду сүрүн телебашнятыгар ыйанар Арассыыйа былааҕын кээмэйэ – 4,5 х 1,5 м, ыйааһына – 2 кг кэриҥэ.

Бу башня шпилэ уйар кыахтаах тыал күүһүгэр анаан ааҕыллыбыт анал кээмэйдэр. Былаах армированнай сиэккэнэн бөҕөргөтүллүбүт олус бөҕө таҥастан оҥоһуллубут. Ол да буоллар, бу таҥас күүстээх тыалтан, ардахтан уонна хаартан эргэрэр. Былааҕы уларытарга үс мачтовик кыттар: биир киһи страховкалыыр, икки киһи эргэ былааҕы усталлар, 525 м бэлиэҕэ түһэллэр, саҥа былаахтаах тахсан туруораллар. Бу үлэ барыта 2-3 чааһы ылар.

Арассыыйаҕа Былаах күнүн 1994 сылтан бэлиэтииллэр. 1668 сыллаахха Алексей Михайлович ыраахтааҕылыыр кэмигэр «Орел» диэн бастакы нуучча хараабылыгар көтөҕүллүбүт үрүҥ-күөх-кыһыл өҥнөөх былаах Арассыыйа историческай былааҕынан ааҕыллар.