Дьокуускай төрөөбүт күнүгэр бырааһынньыктааҕы фейерверк буолбат

Дьокуускай куорат төрөөбүт күнүгэр 40 араас тэрээһини ыытары былаанныыллар, ол эрээри фейерверк ытыытын тохтоттулар. Бу туһунан мээр Евгений Григорьев «Россия 24» ханаалга  «Прямой эфир с городом» биэриигэ иһитиннэрдэ.

«Дьокуускай куорат төрүттэммитэ 393 сылын биэс сиринэн бырааһынньыктыахпыт. Кыайыы 80 сылын учуоттаан, 40 араас тэрээһини ыытыахпыт. Быйыл бырааһынньыктааҕы салюту ыппат туһунан быһаарыныыны ылынныбыт», — диэн киин куорат баһылыга эттэ.

Мээр этэринэн, үгэскэ кубулуйбут сирдэртэн ураты саҥа сирдэргэ эмиэ бырааһынньыгы бэлиэтиэхтэрэ. Холобура, Кыайыы пааркатыгар байыаннай дьайыы кыттыылаахтарын, үтүө көмөһүттэрин чиэстиэхтэрэ.

Тэрээһиннэр балаҕан ыйын 8-14 күннэригэр буолуохтара.