Дьокуускай уонна Аллараа Бэстээх хайысханан салгын сыттыктаах суудуналар cырыылара саҕаланна

Алтынньы 16 күнүттэн, чэппиэртэн, Өлүөнэ өрүскэ гидрологическай балаһыанньа мөлтөөһүнүнэн сибээстээн, катердарынан өрүс таһыыта тохтотулунна.

Бүгүҥҥүттэн Дьокуускай — Аллараа Бэстээх хайысханан дьону таһыы салгын сыттыктаах суудуналарынан ыытыллар, диэн СӨ Тырааныспарга министиэристибэтэ иһитиннэрэр.

Дьокуускайтан «салгын сыттыктаахтар» 204-с түөлбэҕэ баар «Намыв» ыстаансыйаттан айанныыллар. «Бастаан сэттэ «Хивус» үлэҕэ киирдэ. Дьон сырыыта элбээтэҕинэ суудуна ахсаана эбиллиэҕэ. Таһааччылар иһитиннэрэллэринэн, биир пассажирга тарыып 2500 солкуобай», — диэн иһитиннэриигэ этиллэр.

Муус күүскэ устар кэмигэр сыана быстах кэмҥэ үрдүөн сөп диэн таһааччылар сэрэттилэр. Бу уматык ороскуота улаатарынан уонна аэроботтары туһанар наада үөскүүрүнэн сибээстээх.