Дьокуускай уонна Нерюнгри маастар-былааннарын эбийиэктэригэр үп-харчы көрүлүннэ

Бырабыыталыстыба бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев Уһук Илин социальнай-экэнэмиичэскэй сайдыытын боппуруостарыгар Бырабыыталыстыба хамыыһыйатын президиумун мунньаҕын ыытта.

«Бастакы боппуруоһунан экэнэмиичэскэй үүнүү кииннэрин социальнай сайдыытын былааннарыгар киллэриллэр уларытыылары көрүөҕүҥ. Бэрэсидьиэн Уһук Илиҥҥи биир кэлим субсидията Уһук Илиҥҥэ 2 тыһыынчаттан тахса социальнай эбийиэги тутарга уонна саҥардан оҥорорго кыаҕы биэрдэ. Ол иһигэр 138 эбийиэк – быйылгы сылга. Биһиги уокурук сэбиэтигэр эрэгийиэннэр баһылыктарын кытта былааннааһыҥҥа тахсар алҕастартан эбэтэр Уһук Илин сорох субъектарын сиригэр-уотугар хонтуруол мөлтөҕүттэн сылтаан, үбүлээһини биир эбийиэктэртэн атыттарга көһөрөргө күһэллэрбит туһунан кэпсэппиппит. Бу, холобур, Хабаровскай кыраайга, Приморьеҕа, Камчаткаҕа, Забайкальскай кыраайга, Саха Өрөспүүбүлүкэтигэр  сыһыаннаах. Бүддьүөт үбүн көдьүүстээхтик уонна кэмигэр туһаныыга болҕомтобутун күүһүрдүөҕүҥ», – диэн Юрий Трутнев мунньаҕы аста.

Уһук Илиҥҥи эрэгийиэннэр экэнэмиичэскэй үүнүүлэрин кииннэрин социальнай сайдыыларын былааннарыгар уларытыылары киллэрии боппуруоһун чэрчитинэн, Бурятияҕа, Саха сиригэр, Забайкальеҕа, Камчаткаҕa, Приморьеҕа, Хабаровскай кыраайга, Амур уонна Магадан уобаластарыгар, Еврейскэй аптаныамыйалаах уобаласка, Чукоткаҕа маастар-былааннар эбийиэктэригэр уонна атын тэрээһиннэргэ 2026-2028 сылларга Бэрэсидьиэн Уһук Илиҥҥи биир кэлим субсидиятын үбүнэн федеральнай бүддьүөттэн үп-харчы тыырыыта бигэргэннэ.

Саха сирэ Дьокуускай уонна Нерюнгри маастар-былааннарын эбийиэктэригэр үбү-харчыны ылыаҕа: Нерюнгрига «Мужество» оҕо лааҕырын тутуутугар уонна Уһук Илиҥҥи кинопавильону тутарга бырайыак докумуоннарын оҥорууга. Инфраструктураны сайыннарыыга тахсыбыт ороскуоттары толуйуу чааһыгар, Уһук Илиҥҥэ инвестиционнай бырайыактары олоххо киллэрэр юридическай сирэйдэргэ судаарыстыбаннай өйөбүлү оҥоруу мэхэньииһимин уларытыы ырытылынна. «Субсидияны биэрэргэ Уһук Илин аҕыс эрэгийиэниттэн 15 бырайыак талылынна. Барылара бөдөҥнөр, суолталаахтар, эрэгийиэннэр сайдыыларын сүрүн боппуруостарын быһаараллар», – диэтэ Юрий Трутнев.

Мунньахха туспа Сахалин Углегорскай оройуонугар хостонор чоҕу Шахтерскай байҕал пуордугар тиэйэр магистральнай конвейер комплексын тутуу бырайыагын олоххо киллэриитэ көрүлүннэ. Бырайыак 2018 сылтан олоххо киллэриллэр, билигин тутуу-монтаж үлэлэрэ түмүктэннилэр. Конвейер лининьийэтин үлэлэтии чоҕу тиэйии ороскуотун аччатыаҕа.