Дьокуускай ураты уруһуйдардаах уулуссаланыа

     «Куттала суох уонна хаачыстыбалаах суоллар» национальнай бырайыак иитинэн, Дьокуускайга уратытык оҥоһуллубут уулусса баар буолуоҕа.

Дьокуускайга «Үлэ кыбартаала» кластерга тиэрдэр суолга хапытаалынай өрөмүөн салҕанар. Уһук Илиҥҥэ бастакы креативнай кластерга барыта ураты, болҕомтону тардар буолуоҕа, ол иһигэр саҥа аспаалламмыт суол, тротуардар диэн куорат дьаһалтатын пресс-сулууспата бэлиэтиир.

Тротуарга «Лето Якутия» диэн аныгы ускуустуба бэстибээлин кыттыылаахтара уруһуйдууллар. Худуоһунньуктар 527 миэтэрэ уһуннаах аспаалга куорсунтан, дракон төбөтүттэн саҕалаан, араас ойууну-бичиги түһэрбиттэр.