Дьокуускайдааҕы 1 №-дээх оскуола быйыл саас аһыллыаҕа

СӨ Ил Дархана Айсен Николаев тохсунньу 9 күнүгэр Дьокуускайга 253 миэстэлээх 1 №-дээх орто оскуола тутуутун хаамыытын көрдө. Оробуочай сырыытын кэмигэр кини эбийиэк куорат үөрэҕириитин инфраструктуратын сайыннарыыга суолтатын  бэлиэтээтэ. Бу туһунан www.sakha.gov.ru саайта иһитиннэрэр.

«Дьокуускайга 1 №-дээх оскуола тутуута түмүктэнэн эрэр. Эбийиэк Арассыыйа бэрэсидьиэнэ Владимир Путин сорудаҕынан оҥоһуллубут Дьокуускай куорат маастар-былаанын чэрчитинэн, Биир кэлим бэрэсидьиэн субсидиятын үбүнэн тутуллар уонна тэрилтэ 105 сыллаах үбүлүөйүгэр үтүө бэлэх буолуоҕа. Алта тыһыынчаттан тахса кв. миэтэрэ иэннээх саҥа түөрт мэндиэмэннээх дьиэ Дьокуускай киинигэр сталинскай ампир элэмиэннэрдээх ураты дизайннаах оҥоһулунна. Үлэ түмүктэнэр кэрдиис кэмигэр турар, эбийиэк номнуо бэлэм диэххэ сөп, оскуола быйыл саас үөрэнээччилэргэ аанын арыйыаҕа», — диэн өрөспүүбүлүкэ баһылыга эттэ.

Оскуола дьиэтэ өрөспүүбүлүкэ киин куоратын ортотугар, Ленин проспегар тутуллар. Саҥа дьиэ уопсай иэнэ 6 тыһыынча квадратнай миэтэрэттэн тахса. Оскуола биир симиэнэҕэ 253 үөрэнээччи үөрэнэригэр аналлаах. Бырайыагынан сыһыары спортивнай былаһааккалары оҥоруу эмиэ көрүллүбүт.

Бүгүҥҥү күҥҥэ эбийиэк тутуллан бэлэм буолуута 97% буолар. Билигин дизайнерскай үлэлэр, миэбэли хомуйуу уонна туруоруу ыытыллаллар. Эбийиэккэ 29 киһи үлэлиир. Генеральнай тутааччы хампаанньа — «Сахаспецмонтаж-95» ХЭТ. Оскуоланы үлэҕэ киллэрии быйылгы сыл бастакы кыбаарталыгар былааннанар.

Дьокуускай куорат 1 №-дээх оскуолатын дириэктэрэ Таисия Горохова СӨ Ил Дарханыгар уопсай үөрэхтээһин эйгэтигэр өрүүтүн өйөбүлүн иһин махтанна. Дириэктэр оскуола оҕо доруобуйатын сайыннарыыга туһуламмыт концепцияны оҥорбутун туһунан кэпсээтэ.

«Мэдиссиинэ кылаастарын тэрийии уонна доруобуйаны харыстыыр технологиялары туһаныы былааннанар. Арассыыйа үрдүк үөрэҕин кыһаларын уонна М.К. Аммосов аатынан Хотугулуу-Илиҥҥи федеральнай университет мэдиссиинэ академиятын кытта сөбүлэһиилэр түһэрсилиннилэр», – диэн дириэктэр былааннарын үллэһиннэ.

Ил Дархан төрөппүттэри кытта кэпсэттэ. Кинилэр оскуола мэлдьи аатырар күүстээх кэлэктиибин, түмсүүлээх үлэтин уонна үөрэх үрдүк хаачыстыбатын илдьэ хааларын суолталааҕын бэлиэтээтилэр.

2026 сыл бүтүөр диэри Дьокуускайга маастар-былаан үс сүрүн эбийиэгэ үлэҕэ киириэҕэ. Өрөспүүбүлүкэ киин куоратыгар 1 №-дээх орто оскуола, Муусука үрдүкү оскуолата арыллыахтара, ону таһынан «Спортивнай» түөлбэ олохтоохторун көһөрүөхтэрэ.

2020 сылтан Саха сиригэр 62 оскуола уонна 36 оҕо уһуйаана тутуллан үлэҕэ киирдэ, 100-тэн тахса үөрэх эбийиэгэр хапытаалынай өрөмүөн ыытылынна. 40 тыһыынчаттан тахса оҕо үөрэнэр усулуобуйата тубуста. Саха сирин Ил Дархана Айсен Николаев Ил Түмэҥҥэ туһаайан этиитигэр эрдэ бэлиэтээбитин курдук, эрэгийиэҥҥэ үөрэх инфраструктуратын саҥардыы тэтимэ ааспыт уонча сыллар көрдөрүүлэрин куоһарбыта.