Дьокуускайдааҕы киинэ бэстибээлэ аһылынна!

7-с төгүлүн ыытыллар Дьокуускайдааҕы киинэ бэстибээлин аһыллыыта артыыстар, режиссердар, киинэни устааччылар Кыһыл көбүөрүнэн хаамыыларыттан саҕаланна.

Кыһыл көбүөр устун Ил Дархан Айсен Николаев кэргэнэ Людмила Валерьевнаны кытта бииргэ хаамтылар.
Киинэ бэстибээлин аһыллыыта Саха тыйаатырыгар буолла. Сааланы толору ыҥырыылаах ыалдьыттар муһуннулар.
Айсен Николаев, Ил Дархан:
— Мин бэстибээл хайдах төрөөн-үөскээн тахсыбытын өйдүүбүн. 2013 сыллаахха кэккэ ыарахаттар бааллар этэ. Бу кэмтэн саха киинэтэ »феномен» диэн ааттанна.
Мин Дьокуускайга биир кэмҥэ бөдөҥ аан дойдутааҕы тэрээһиннэр ыытыллар буолбутуттан киэн туттабын. Саха киинэтэ Арассыыйаҕа, аан дойдуга аатырбытынан киэн туттабын! Былырыын Арассыыйа аан дойдутааҕы бэстибээллэргэ кыайбыт киинэлэриттэн 25%-на Саха сиригэр уһуллубут. Ол курдук, 20-тэн тахса киинэ хампаанньалара уонна айар устуудьуйалара 200-тэн тахса киинэни устубуттар. Ол эбэтэр, биир сыл устата атын эрэгийиэннэр бары холбоон устубуттарынааҕар, элбэх киинэ уһуллубут.
Мин анаан бу сыыппаралары үөрэппитим. Сүбэһитим Андрей Борисовтыын сүбэлэһэн баран, »Желанный берег» пуоруму сыллата ыытарга быһаардыбыт. Тиэмэтэ сыл аайы уларыйа сылдьыаҕа: киинэ, эпос, тыйаатыр, муусука…
Бэрэсидьиэн Владимир Путин Дьокуускайга кэлэ сырыттаҕына, киинэ павильонун бырайыагын көрдөрбүппүтүн, өйөөбүтэ. 2027 сылга диэри киинэ павиьона тутуллуо диэн эрэнэбин. Оччоҕо өссө үрдүк таһымнаах киинэлэр уһуллуохтара, — диэн эттэ.
РФ култуураҕа министиэристибэтин үлэһитэ Дмитрий Давыденко — бэстибээл бочуоттаах ыалдьыта.
— Миниистир аатыттан бэстибээл аһыллыытынан истиҥ эҕэрдэбин тиэрдэбин! Бүгүн — киинэ дьиҥнээх бырааһынньыга! Ханнык баҕарар бэстибээл сүрүн сыала — саҥа киинэ, саҥа бырайыак төрөөһүнэ. Саха киинэтин феномена диэн тугуй диэн миигиттэн үгүстүк ыйыталлар. Онуоха кистэлэҥэ — төрөөбүт дойду, дьон-сэргэ туһунан чиэһинэй, истиҥ киинэни устуу дии саныыбын, — диэн кини эттэ.
Андрей Борисов, Ил Дархан сүбэһитэ:
— Барыта 6 бэстибээл буолан ааспыта, ол саха киинэтин базата үөскүүрүгэр, аата ааттанарыгар тирэх буолбута. Сэттис бэстибээл киинэ павильона тутулларыгар, киинэ индустрията салгыы сайдарыгар туһуланар. Ити уустук суол эрээри, олус интэриэһинэй, — диэн эттэ.
Бу кэннэ »Сахафильм» хампаанньа дириэктэрэ Алексей Егоров уонна Андрей Борисов бэстибээл аһыллыбытынан биллэрдилэр. Дьокуускайдааҕы киинэ бэстибээлигэр араас дойдулартан 9 киинэ талыллан, күрэстэһиэҕэ.

Киинэлэри »Лена» киинэ тыйаатырыгар босхо баран көрүөххэ сөп.