Дьокуускайдааҕы килиэп кэмбинээтин бородууксуйата «Арассыыйаҕa оҥоһулунна» бэлиэни ылла

Дьокуускайдааҕы килиэп кэмбинээтин «Туймаада остуоруйалара» кэмпиэттэрэ быйыл «Арассыыйаҕа оҥоһулунна» диэн бочуоттаах сэртипикээти ылла.

Бу улахан бэлиэ бородууксуйа Арассыыйа хаачыстыбатын стандаартарыгар сөп түбэһэрин бигэргэтэр уонна Саха сирин гастрономическай брендын буоларын көрдөрөр.

«„Туймаада остуоруйалара“ –  боростуой минньигэс ас эрэ буолбатах, үрдүк хаачыстыбалаах бородууксуйаттан тапталынан айыллыбыт саха кутун хамсатар минньигэс аһылыгынан буолар. Хас биирдии кэмпиэт норуот үһүйээннэрин аптаах эйгэтинэн бүрүллүбүт, ол кэмпиэти ураты уонна хатыламмат гынар. Биһиги килиэппит кэмбинээтэ РФ Бэрэсидьиэнэ Владимир Путин көҕүлээбит „Көдьүүстээх уонна конкуренцияҕа кыайтарбат экэниэмикэ“ национальнай бырайыак „Үлэ оҥорон таһаарыыта“ диэн көҕүлээһинин чэрчитинэн Компетенция федеральнай киинин кэҥэтиллибит өйөбүлүн туһунан сөбүлэһиини өрөспүүбүлүкэҕэ бастакынан түһэристэ», – диэн тэрилтэ технологтара бэлиэтээтилэр.

Бу сөбүлэһиигэ олоҕуран, кэмбинээт үлэ оҥорон таһаарыытын сыл аайы 10 %-нан үрдэтэргэ эбээһинэс ылыммыта. 2023 сылтан саҕалаан тэрилтэ көдьүүһү үрдэтэр дьаһаллары көхтөөхтүк ылынан барбыта.

Бүгүҥҥү күҥҥэ Дьокуускайдааҕы килиэп кэмбинээтэ 180 көрүҥ бородууксуйаны таһаарар уонна 17 анал маҕаһыыны салайар. 85 сыллаах үлэтин устата кини 947 мөлүйүөн кэриҥэ  килиэби оҥорон таһаарда.