Дьокуускайдааҕы мэдиссиинэ кэллиэһэ федеральнай граны сүүйдэ

В.А.Вонгродскай аатынан Дьокуускай куораттааҕы мэдиссиинэ кэллиэһэ “Профессионалитет” бырайыагынан федеральнай граны сүүйдэ. Үбүлээһин кээмэйэ 60,5 мөл. солк. тэҥнэһэр. Ити туһунан Ил Дархан Айсен Николаев телеграм-ханаалыгар иһитиннэрэр.

Үбү клиническэй уонна профилактическай мэдиссиинэ аныгы үөрэтэр кластерын тэрийиигэ ыытыахтара.

“Бу доруобуйа харыстабылын сайыннарыыга мин стратегическай ыйаахпар бэлиэтэммит үлэни быһаччы салҕааһын буолар. Биһиги каадырга тирэҕи бөҕөргөтөбүт, мэдиссиинэ үөрэҕин кыаҕын кэҥэтэбит уонна хаачыстыбалаах көмө тэҥ таһыма турарын ситиһэбит” – диэн Айсен Николаев бэлиэтиир.

Мэдиссиинэ саҥа кластерыгар Нерюнгри уонна Алдан мэдиссиинэҕэ кэллиэстэрэ киириэхтэрэ.

“Бу үөрэх лабаратыарыйаларын саҥардарга, аудиториялары аныгы тэрилинэн хаҥатарга уонна мэдиссиинэҕэ каадыры бэлэмнээһин хаачыстыбатын биллэ үрдэтэргэ көмөлөһөр саҥа мастарыскыайдары тэрийэргэ көмөлөһүөҕэ” – диэн Ил Дархан бэлиэтиир.

“Профессионалитет” бырайыак РФ Бэрэсидьиэнэ Владимир Путин көҕүлээбит “Ыччат уонна оҕолор” саҥа национальнай бырайыак иитинэн олоххо киирэр.  Бырайыак экэниэмикэ инники күөҥҥэ турар салааларыгар ирдэнэр каадыры бэлэмнээһин көдьүүстээх систиэмэтин олохсутууга туһаайыллар. Бу туһунан Ил Дархан уонна Бырабыыталыстыба пресс-сулууспата суруйар.