Дьокуускайдааҕы оҕо уһуйаана эчэйбит оҕоҕо 450 тыһ. солк. төлүүр эбээһинэстэннэ

Дьокуускайдааҕы оҕо уһуйаанын эчэйбит оҕоҕо 450 тыһ. солк. кээмэйдээх моральнай хоромньуну толуйарга эбээһинэстээтилэр. Бу туһунан алтынньы 10 күнүгэр СӨ Борокуратууратын пресс-сулууспата иһитиннэрдэ.

Бэрэбиэркэ үс саастаах оҕо эчэйбитинэн 75 №-дээх «Ивушка» оҕо уһуйааныгар ыытылынна. Быһылаан бу сыл бэс ыйын саҕаланыытыгар тахсыбыт.

«Оҕо араас саастаах оҕолор бөлөхтөрүгэр сылдьан, иитээччи баар кэмигэр, атаҕын уҥуоҕун тоһутан улахан эчэйиини ылбыт», – диэн кэтээн көрөр биэдэмистибэ иһитиннэриитигэр этиллэр. Онуоха эчэйбит оҕоҕо бастакы мэдиссиинэ көмөтүн оҥорботохтор, суһал көмө биригээдэтин ыҥырбатахтар.

Суут дьүүллэһиитин түмүгүнэн, оскуола иннинээҕи тэрилтэ буолбут быһылааҥҥа эппиэтинэстээҕинэн билинилиннэ уонна моральнай хоромньуну толуйарга сорудахтанна.