Дьокуускайдааҕы территориальнай быыбардыыр хамыыһыйа куоластааһын түмүктэрин таһаарда

Бүгүн Дьокуускай куораттааҕы территориальнай быыбардыыр хамыыһыйа үс күн ыытыллыбыт муниципальнай быыбар түмүктэрин таһаарда.

Дьокуускай куорат үрдүнэн 41,35 % быыбардааччы кытынна диэн Дьокуускай куораттааҕы территориальнай быыбардыыр хамыыһыйа бэрэссэдээтэлэ Сардаана Алексеева суруналыыстарга иһитиннэрдэ.

Уокуруктааҕы быыбар хамыыһыйаларын  уонна Дьокуускай куораттааҕы территориальнай быыбардыыр хамыыһыйа боротокуолларынан быыбар дьиҥнээхтик уонна сөптөөхтүк барбытын быһаарда.

Дьокуускай куорат Дууматыгар 30 дьокутаат талылынна.

Мандааттары үллэрии баартыйаларынан маннык буолбут: «Биир ньыгыл Арассыыйа» — 8, КПРФ — 2, «Саҥа дьон» — 2, ЛДПР — 1, «Арассыыйа Коммунистара» — 1, «Сиэрдээх Арассыыйа – Кырдьык иһин» — 1 киһи.
Биир мандааттаах быыбардыыр уокуруктарга 13-һэ «Биир ньыгыл Арассыыйа» баартыйа чилиэннэрэ, 2-тэ бэйэлэрэ туруоруммут хандьыдааттар.

Үс күннээх куоластааһыҥҥа быыбар сокуонун куруубайдык кэһии түбэлтэтэ тахсыбата. Быыбарга кыттыбыт дьон быыбар үрдүк тэрээһиннээхтик ыытыллыбытын бэлиэтээтилэр диэн Сардаана Борисовна эттэ.

«Дьокуускай куорат быыбардааччыларыгар куоластааһыҥҥа актыыбынайдык кэлэн кыттыбыккытыгар махтанабын», — диэн Дьокуускай куораттааҕы территориальнай быыбардыыр хамыыһыйа бэрэссэдээтэлэ Сардаана Алексеева түмүктээтэ.