«Дьокуускайдааҕы үүт собуота» сыыр сыаҕар саҥа сезону аста

Бу күннэргэ «Дьокуускайдааҕы үүт собуота» ХЭТ сыыр сыаҕар саҥа сезона үөрүүлээхтик аһылынна. Сыах 1996 сылтан үлэлиир.

Бу туһунан СӨ Тыатын хаһаайыстыбатын министиэристибэтэ иһитиннэрэр. Бүгүҥҥү туругунан 6 көрүҥ сыыр оҥоһуллар: Дьиэтээҕи, Российскай, Голландскай, Пошехонскай, Кавказскай уонна Моцарелла. Сезон үс көрүҥ сыыры оҥорууттан саҕаланна: сымнаҕас «Дьиэтээҕи» уонна кытаанахтыҥы сыырдартан — «Российскай» уонна «Голландскай». Кинилэртэн бастакыта, уһуннук ситэри-буһарыыны эрэйбэт көрүҥ, атырдьах ыйын 25 күнүгэр атыыга тахсан эрэр. Оттон буһар болдьоҕо 40 хонукка тэҥнэһэр кытаанахтыҥы сыырдары оҥоруу технологическай сүрүн түһүмэхтэриттэн биирдэстэрин ааһа турар. Оҥорон таһаарыы бырасыаһын 20 сыллаах уопуттаах, Дьокуускайдааҕы куорат үүтүн собуотун сыыр оҥорор маастара Константин Георгиевич Ишуткин салайар.

Атырдьах ыйын 27 күнүгэр сыыр сыаҕар суруналыыстарга Аһаҕас аан күнэ ыытылынна. Тэрээһин чэрчитинэн экскурсия тэрилиннэ, онно ыалдьыттар сыыр оҥоһуллуутун бырасыаһын кытта билистилэр. Суруналыыстар сыыры оҥоруу толору эргиирин көрдүлэр, ону таһынан сыыр төбөлөрүн куурдар уонна бэлэм бородууксуйаны ситэрэр-буһарар аналлаах камераларга сырыттылар. Ыалдьыттар сыыр оҥорор маастарга уонна собуот салайааччыларыгар бары интэриэһиргиир ыйытыыларын биэрдилэр. Тэрээһин сыыр көрүҥнэрин амсайан көрүүнэн түмүктэннэ. Онно «Дьиэтээҕи» сыыр уонна «Молочный дождик» бородууксуйа саҥа көрүҥнэрэ – битэмииннэринэн байытыллыбыт оҕо үүтэ, 4% йогурт уонна 20% сүөгэй көрдөрүлүннүлэр. Бу сезоҥҥа 13 туонна сыыры оҥорон таһаарарга былааннанар. «Молочный дождик» Дьиэтээҕи сыыра Дьокуускай куорат маҕаһыыннарыгар номнуо атыыга таҕыста.