Дьокуускайга 12 саастаах уолу эккирэппит киһини көрдүүллэр

Дьокуускайга Очиченко уулуссатыгар 12  саастаах уолу эр киһи эккирэппитин туһунан  үҥсүү полицияҕа  киирбит.

Кини оҕону Очиченко уулуссатыттан саҕалаан эккирэппит. Бу туһунан оҕо ийэтэ полицияларга сайабылыанньа түһэрбит.

Бэҕэһээ, кулун тутар 13 кнүгэр, уол киэһэ 18.20 ааһыыта маҕаһыыҥҥа тахсыбыт. Онуоха оранжевай сибиитэрэлээх билбэт эр киһитэ уолу суолга тохтоппут уонна кэпсэтэ сатаабыт.

«Уолум оптуобус тохтобулугар 40-50 кэриҥэ саастаах оранжевай таҥастаах эр киһини көрбүт. Аттынан ааһан истэҕинэ, эр киһи тохтоппут уонна колобуогу көрбүтүҥ дуо диэн ыйыппыт. Оҕо колобок диэн маҕаһыыны этэр дии санаан, тохтобул утары турар маҕаһыыны ыйбыт уонна салгыы барбыт. Эр киһи кэнниттэн эккирэтэн иһэрин көрөн уолум олус куттаммыт. Маҕаһыын таһыгар эр киһи ситэн кэлбит уонна уолбун колобуогу көрдүү барыах диэн хаайбыт. Уолум туох эрэ куһаҕан тахсаары гыммытын сэрэйэн кэпсэппэтэх, маҕаһыыҥҥа киирэн хаалбыт. Эр киһи таһырдьа кэтэһэн турбут. Ити кэмҥэ уолбут биһиэхэ, төрөппүттэригэр суруйбута.  Уолум тахсыбыта эр киһи суох эбит», — диэн уол ийэтэ социальнай ситимҥэ суруйбут. ИДьМ иһитиннэрбиттэринэн, полиция оҕону батыспыт эр киһини көрдүүр.