Дьокуускайга 140-ча киһи үбүлүөйдээх этнографическай дьыктааны суруйда

Норуот сомоҕолоһуутун күнүгэр Дьокуускайга А.Е. Кулаковскай аатынан Норуоттар доҕордоһууларын дьиэтин былаһааккатыгар сыл аайы ыытыллар «Улахан этнографическай дьыктаан»  аахсыйа буолан ааста.

Тэрээһиҥҥэ 140-ча киһи  кэлэн кытынна. Быйылгы аахсыйа Улуу Кыайыы 80 сылыгар уонна Аҕа дойдуну көмүскээччи сылыгар ананна. Дьыктаан тэриллиэҕиттэн  ыла куруук ыытыллар былаһаакканан буолбут Норуоттар доҕордоһууларын дьиэтэ араас омук бэрэстэбиитэллэрин, уопсастыбаннай түмсүү лидердэрин уонна ыччаты түмтэ.

Өрөспүүбүлүкэ бырабыыталыстыбатын бэрэссэдээтэлин солбуйааччы Георгий Степанов тэрээһин суолтатын бэлиэтээтэ. Кини этэринэн, дьыктаан дойдуга итэҕэли уонна сомоҕолоһууну көрдөрөргө көмөлөһөр. «Бу көннөрү дьыктаан эрэ буолбатах, мин санаабар, биһиги ити ньыманан дойдубут устуоруйатын, култууратын  билэн,  тапталбытын биллэрэбит», — диир Георгий Степанов. Түмүктэр ахсынньы 12 күнүгэр, РФ Конституциятын күнүгэр, биллиэхтэрэ.