Дьокуускайга 17 саастаах кыыс дьүөгэтиттэн көмүһү уорууга уорбаланар

Дьокуускай куорат полициятын отделын дьуһуурунай чааһыгар олохтоох кыыс кыбартыыратын иһиттэн көмүс киэргэллэрин уорбуттарын туһунан биллэрбит. Хоромньу суумата 70 тыһыынча солкуобай буолбут.

Бу туһунан Саха сиринээҕи ИДьМ пресс-сулууспата иһитиннэрэр.

Холуобунай ирдэбил үлэһиттэрэ уорбаланааччы лиичинэһин быһааран, эмсэҕэлээччи 17 саастаах билэр кыыһын туппуттар.

Силиэстийэ быһаарбытынан, уорбаланааччы кыыс эмсэҕэлээччи дьүөгэтигэр ыалдьыттыы уонна косметичкатын ыла тиийбит. Ваннаҕа сылдьан кыыс кыһыл көмүс браслеты уонна кириэстээх сыабы бэлиэтии көрбүт. Көмүс киэргэллэри уорбут, атыылаабыт уонна харчыны тус наадатыгар туһаммыт.

«Уоруу» ыстатыйанан холуобунай дьыала тэрилиннэ. Уорууллубут мал былдьанна.