Дьокуускайга 17 саастаах оҕо питбайк күрэппит уонна кырааскалаабыт

ИДьМ 1 №-дээх полициятын дьуһуурунай чааһыгар Тимирязев аатынан уулуссаҕа олорор дьиэ тиэргэниттэн питбайк матасыыкылы күрэппиттэрин туһунан сайабылыанньа киирбит. Хоромньу суумата — 110 тыһыынча солкуобай. Бу туһунан ИДьМ пресс-сулууспата иһитиннэрэр.

Суһал-ирдиир дьаһалларынан полиция үлэһиттэрэ 17 саастаах олохтоох оҕону туппуттар.
Сокуоннай сааһын ситэ илик оҕо дьиэ тиэргэнигэр питбайк стоянкаҕа турарын бэлиэтии көрбүт уонна күрэтэргэ санаммыт. Ким да суоҕуна матасыыкылы күрэтэн барбыт.

Кэлин бэйэтэ туһанар санаалаах матасыыкылы кырааскалаабыт. Уоруллубут матасыыкыл былдьанна. Холуобунай дьыала тэрилиннэ. Буруйдаах 5 сылга диэри болдьоххо көҥүлэ быһыллыан сөп.