Дьокуускайга 17 саастаах уол оҕо төлөпүөнүн сэрээттии олорон уокка оҕустаран өлбүт

Силиэстийэлиир отдел Дьокуускай куорат Халтурин уулуссаҕа баар биир дьиэ кыбартыыратыгар 17 саастаах уол оҕо өлбүтүнэн сибээстээн, «Сэрэҕэ суохтан өлүүгэ тиэрдии» ыстатыйанан холуобунай дьыаланы көбүттэ. Бу туһунан биэдэмистибэ пресс-сулууспата иһитиннэрэр.

Силиэстийэ дааннайынан, бу сыл алтынньы 8 күнүгэр Дьокуускай куорат олохтооҕо кыбартыыратыгар 17 саастаах уолун булбут. Уол оҕо этигэр-сиинигэр, түөһүн туһаайыытынан уокка сиэтиллибит баастар көстүбүттэр. Кэлбит суһал көмө биригээдэтэ уол өлбүтүн бигэргэппит.

Быһылаан буолбут сирин көрүү түмүгүнэн, силиэстийэлиир бөлөх өлбүт уол таһыгар уокка холбонон турар суотабай төлөпүөнүн булбут.

Быһа барыллаан быһаарыллыбытынан, уол оҕо төлөпүөнүн сэрээттии олорон туттубут уонна биллибэт төрүөтүнэн уокка оҕустарбыт. Билиҥҥи туругунан быһылаан туох-ханнык төрүөттэн тахсыбытын быһаарар сыалтан силиэстийэлиир дьайыылар ыытыллаллар.