Дьокуускайга 21 тиэргэни тупсаран оҥороллор
![](https://sakha-sire.ru/wp-content/uploads/2023/07/blagoustr-foto-960x596.jpg)
2023 сылга Саха сиригэр «Уһук Илиҥҥэ 1000 тиэргэн» бырайыагынан 62 тиэргэни уонна мини-пааркалары тупсаран оҥорор былааннаахтар. Бырагырааманы олоххо киллэрэргэ Дьокуускайга 21 тиэргэн оҥоһуллуохтаах. Онтон хаалбыт 41 тиэргэн — 26 улууска.
Өрөспүүбүлүкэ киин куоратыгар 39 аадырыһынан элбэх кыбартыыралаах 21 тиэргэҥҥэ тупсарыы үлэтэ ыытыллыахтаах.
Бырагырааманы олоххо киллэрэргэ быйыл СӨ Ил Дарханын бырагырааматыгар «Мой двор» — 150 мөл.солк., «Уһук Илиҥҥэ 1000 тиэргэн» федеральнай бырайыак иитинэн — 150 мөл. солк. уонна киин куораты тупсаран оҥоруу үс сыллаах былаанынан — 150 мөл.солк. көрүллүбүт.
Тупсаран оҥоһуллухтаах тиэргэннэри көрүү уонна хаартыскаҕа түһэрии ыытыллыбыт. Элбэх кыбартыыралаах дьиэлэр олохтоохторун кытары көрсүһүүлэр тэриллибиттэр. Олор түмүктэринэн бэлиэтээһиннэр, ыйыллыбыт сэмэлэр, баҕа санаалар учуоттаныллыбыттар уонна тиэргэннэри тупсаран оҥоруу былааннарыгар көннөрүүллэр киллэриллибиттэр.
Айан суолугар, былаһааккаларга, тротуардарга, кыра архитектурнай формаларга бырайыактыыр быһаарыылар түмүктэммиттэр. Тупсаран оҥоруу иитинэн, бары тиэргэннэргэ массыына туруорар сирдэр, тротуардар бэрээдэктэммиттэр, оҕо оонньуур уонна спортивнай былаһааккалара, сынньанар сирдэр, ыскамыайкалар, бөх тоҕор анал урналар баар буолуохтара, уота-күөһэ оҥоһуллуо.
Билигин тупсаран оҥоруу былааныгар киллэриллибит тиэргэннэртэн тутуу бөҕүн тиэйии, таһыы, аспаалга, тротуарга үлэлэр саҕаланнылар.
Санатар буоллахха, Уһук Илиҥҥэ тыһыынча тиэргэни саҥардан оҥоруу туһунан 2021 сыллаахха балаҕан ыйыгар РФ бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук-Илиҥҥи Федеральнай уокуругун боломуочуйалаах бэрэстэбиитэлэ Юрий Трутнев иһитиннэрэн турар. Бырагыраама иитинэн бары Уһук Илин эрэгийиэннэрэ тиэргэннэри тупсаран оҥорууга федеральнай бүддьүөттэн үп-харчы туппуттара. Былырыын Саха сирэ «Уһук Илиҥҥэ 1000 тиэргэн» бырагырааманы олоххо киллэрэргэ 846 мөл.солк. ылбыта. 37 куоракка уонна сэлиэнньэлэргэ 124 тиэргэн уонна мини-пааркалар, итинтэн 75 Дьокуускайга тупсарыллан оҥоһуллубуттара. Биир саамай сүрүнүнэн, бырагырааманы олоххо киллэрэргэ олохтоохтор көхтөөх кыттыылара буолар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: СИА
Сообщить об опечатке
Текст, который будет отправлен нашим редакторам: