Дьокуускайга 223 ыалга баһаары биллэрэр тэриллэри туруордулар

Дьокуускай куорат гражданскай оборуонаҕа, нэһилиэнньэни, сири-уоту көмүскээһиҥҥэ, баһаартан куттала суох буолууга управлениета элбэх оҕолоох уонна ыарахан балаһыанньаҕа түбэспит дьиэ кэргэттэргэ көмө быһыытынан, баһаар буруотун биллэрэр тэриллэри (АДПИ)  туруорар.

Бу баһаар буруотун эрдэттэн биллэрэр тэриллэри босхо туруоран биэрэллэр. Үлэ «Модун СБ» тэрилтэни кытта муниципальнай хантараак чэрчитинэн ыытыллар.

Бүгүҥҥү күҥҥэ барыта 223 ыалга 872 устуука баһаар буруотун биллэрэр тэрили туруорбуттар.

Элбэх оҕолоох уонна ыарахан балаһыанньаҕа түбэспит буоллаххытына, маннык тэрили туруортарарга куорат уокуруктарын дьаһалталарыгар тиийэн, сайаапка биэрэҕит.

Бу саҥа саҕаланан эрэр баһаар буруотун билэн, улахан тыаһы таһаарар тэрил олус көдьүүстээх. Эрдэ биллэрэр, улахан тыастаах  буолан, утуйа да сытар дьон уһуктан, быыһаммыт түбэлтэлэрэ үгүс.

Бу тэрили туруорарга анал баһаарынай сигнализация тардыллыбат, туох да эбии тэрил наадата суох. Сылга биирдэ батарыайкатын уларытыахха уонна пылесоһунан быылын оборторуохха эрэ наада.