Дьокуускайга 23 саастаах суоппар оҕону түҥнэри көттө

Бэҕэһээ, кулун тутар 20 күнүгэр, Дьокуускай куорат Билибин уулуссатын 18 №-дээх дьиэтин таһыгар тоҕус саастаах оҕону «Тойота Аллион» массыына түҥнэри көппүтүн туһунан иһитиннэрии ГИБДД дьуһуурунай бөлөҕөр киирбит.

Эмсэҕэлээччи суолу туоруур көҥүллэммэт сиринэн туораан испит. Суһал мэдиссиинэ көмөтүн биригээдэтэ эмсэҕэлээбит оҕону балыыһаҕа илдьибит.

Бэлиэтээн суруйдахха, «Тойота Аллион» массыына 23 саастаах суоппара массыына ыытар быраабын былырыын, 2022 сыллаахха ылбыт. Биир сыл иһигэр массыына ыыта сылдьан 22-тэ административнай эппиэтинэскэ тардыллыбыт. Быһылаан кэмигэр суоппар арыгы испэтэх диэн быһаарбыттар.

Сааскы халтараан кэмҥэ суолу анал дьураата, светофора суох сиринэн туоруур сэрэхтээҕин туһунан ГИБДД сэрэтэр. Оттон суоппардар болҕомтолоох буолуохтарын наада!