Дьокуускайга -30 кыраадыска диэри тымныйыа

Бээтинсэ түүнүгэр Дьокуускайга салгын температурата -26…-28 кыраадыска диэри тымныйыаҕа. Күнүс Саха сиринээҕи гидрометеосулууспа кыралаан хаардыырын уонна -17…-19 кыраадыс тымныы буолуо диэн сабаҕалыыр.

Өрөспүүбүлүкэ киин, арҕаа уонна соҕуруу улуустарыгар эмиэ кыралаан хаардыыр, оттон Өлүөнэ алын тардыытынан уонна Халыма бөлөх улуустарыгар хаар түһэрэ күүтүллэр.

Түүнүн киин улуустарга -25…-30, арҕаа -16…-21, хотугулуу-илин -33…-38, намыһах сирдэргэ -40…-45 кыраадыска диэри тымныйыа. Күнүс кииҥҥэ -15…-20, соҕуруу, соҕуруулуу-арҕаа -10…-15, сорох сирдэргэ -5…-10, хотугулуу-илин -25…-30, намыһах сирдэргэ -30…-35 кыраадыс тымныы буолуоҕа.

Эдьигээн уонна Мииринэй улууһун хоту өттүгэр тыал түргэнэ сөкүүндэҕэ 9-14 миэтэрэҕэ тиийэрэ күүтүллэр. Арктика кытылыгар тыал 15-20 м/с күүһүрүө, сорох сирдэринэн силлиэ, тибии түһүө диэн сэрэтэллэр.